ابو اللى جاب ابو الفرى لانس

موضوع النهاردة عن حاجة معظم الناس بيبقى نفسها انها تعملها علشان تزود دخلها وهى فعلا بتزود الدخل
يعنى مثلا ممكن تقبض مرتب شهر فى اسبوع وحاجات كده و ده بيعتمد على نوع الشغل بتاعك

التسمية هى "فرى لانس" يعنى انت كده بتشتغل فى وقت الفراغ بتاعك وعادة بيبقى الحساب بالقطعة
بس المشكلة هنا ان الفرى لانس مش بييجى فى وقت الفراغ, لأ بيجيى وقت اما بتبقى مشغول بالضبط و غرقان حتى اذنك فى الشغل

واللى يضايقك انك بتحاول تمسك العصاية من النص و توازن ما بين الاثنين بس مش بيحصل للأسف و لازم كفة تتقل عن الكفة التانية

و على رأى المثل " صاحب بالين كداب

بس انا فعلا كنت عايز ابقى صاحب بالين و انا متأكد انى كنت حاعرف ابقى صاحب بالين بس للاسف زى ما قلت فوق
"فى كفة استفزتنى انى ارجح الكافة التانية" و هو ده اللى حصل

امبارح انا كنت فى بيت واحد كان زميلى فى شغل و كنا بنشتغل فى مشاريع طلبة هندسة قسم عمارة وكنت كل يوم باأبات عند الاخ و اصحى تانى يوم اروح الشغل و ارجع عنده علشان اكمل

لغاية امبارح حصل الحوار التالى قبل ما نقول حتى بسم الله الرحمن الرحيم (هو مش بالترتيب بالضبط و فى حاجات انا ما كتبتهاش بس مش حا تأثر على الاحداث )

هو : يا "ر" احنا عايزين نخلص التاسك اللى ورانا دى و لازم تخلص النهاردة

انا : ان شاء الله يا "ن" تخلص النهاردة ربنا يسهل

هو: طبعا ماانا عارف انه ان شاء الله بس
ايوة هنا بقى ابتدينا الكلام اللى ينرفز اول ما تسمع "ان شاء الله بس" دى تعرف ان الكلام اللى بعد بس مش ظريف

تكلمة بس : بس انت يا "ر" امبارح جيت متأخر و ماعملتش التاسك اللى عليك و جيت نمت انت امبارح ما عملتش حاجة و اشتغلت كام ساعة امبارح ؟

انا : اشتغلت 3 ساعات قبل ما انام و 2 بعد اما قمت من النوم

هو : ياسلام 2 بعد ما قمت من النوم ؟

انا : ايوة من الساعة ستة و ربع لغاية الساعة تمانية و ربع

هو: طيب انت عارف اننا مش بنشتغل بالساعات و اننا بنشتغل بالتاسك

انا :ايوة بس سؤالك ما كانش كده

هو: انت امبارح جيت متأخر و النهاردة انت جاى متأخر و كل اللى علمته امبارح انك نمت و دلوقتى احنا متأخرين

انا : انت فيه يوم اجلته علشان كنت مع البنت علشان تسلم المشروع بتاعها

انا: و انت عارف انى باشتغل و ظروف الشغل بتاعى اتغيرت ..... صاحب الشغل طلب من حاجات و انا ما ينفعش انى اقول له معلش اصل عندى شغلانة برة لازم اروح اخلصها
ظروفى اتغيرت

هو(بنرفزة وزعيق): اسمع بقى انت قاعد طول الوقت بتتكلم و مش سايبنى اتكلم

انا : بالراحة يابنى عروقك بتفط بالراحة و ما تزعقش.....اتفضل اتكلم

هو:ايوة بس زى ما هو ليه حق عليك انا كمان ليا حق عليك
( ابتدينا بقى فى موضوع يأنا يا هو )

انا : اسمع انا حاقولك حاجة حلوة .... احنا عملنا مشروع واحد من تلاتة صح

هو : صح

انا: طيب الشغلانة اللى انا بأشتغلها دى انا خدت فلوسها ؟

هو(بنرفزة) : احنا ما اتفقنا انى حاديلك الفلوس مرة واحدة بعد ما نخلص

انا : رد على بأه او لأ

هو(بنرفزة): انت يابنى فاكرنى حاكل عليك حقك و احنا ما اتفقناش على كده

انا : رد علي

هو : لأ

انا : طيب انا حاديلك ملفات الحاجات اللى عملتها فى الشغلانة دى و مش عايز حقها ياعم اعتبرها منى هدية و عايز حق الشغلانة اللى خلصت

هو(بنرفزة): احنا ما اتفقناش على كده احنا اتفقنا على انك تخلص التلات مشاريع و لو انت عايز فلوس
( خرج برة الاوضة و دخل معاه فلوس

انا : مش حكاية كده بس انا خلاص مش حاينفع اشتغل بالطريقة دى

هو(بنرفزة): انا جايبك علشان انت محترف و قلت ليك جيب اللاب توب بتاعك جيب قعدت تقول عايز ماوس و كى بورد

انا : انا ياعم لا محترف و زفت

هو(بنرفزة) : معلش بقى يا "ر" انت لو مشيت دلوقتى يبقى سورى

انا :يا عم انا مش قد المسئولية

هو سمع التليفون بتاعه بيرن و قال : ثانية و احدة و الدتى عايزانى

دخل و كان هادى شوية و قال : ها انت وصلت لأيه

انا: بص يا "ن" انا مش قد المسئولية و علشان كده انا حامشى قبل ما اى حاجة تحصل و ما تلحقش تسلم المشاريع والملفات بتاعت المشروع التانى اهى و اعتبرها منى اعتذار للخطأ اللى حصل

هو : ربنا يوفقك (هى زى ربنا يخرب بيتك بس بطريقة غير مباشرة ) و معلش اذا كنت اتعصبت عليك بس ده مستقبل ناس و لازم اننا ناخد بجدية لأن الناس دى مسئوليتنا

انا فى سرى (يابنى انت فاكر انى شغال عندك

انا : ماشى بس فى نقطة اذا كان اصحاب المشاريع دول جايين اخر يومين فى السنة يعملوا المشاريع بتاعتهم يعنى هما اولى مننا بأنهم يهتموا بالمشاريع بتاعتهم و يدولنا المشاريع نخلصها فى و قت معقول مش اكلين نايمين شاربين على المشاريع بتاعتهم اكيد احنا مش حانكون مهتمين بمشاريعهم اكتر منهم

هو: انت مش قبلت يبقى لازم تكون قد المسئولية

انا : يابنى ظروفى اتغيرت انت عايز ايه اكتر من انى كنت باكل و انا ماشى فى الشارع

هو: انا مااكلتش من الصبح

انا : اذا كنت انت قاعد فى بيتك و حالتك صعبة (و انت قاعد فى التكييف و ادام الجهاز بتاعك و اخر حلاوة ) امال انا اعمل ايه و انا برة البيت وبقالى 3 ايام ما غيرتش هدومى

هو : يعنى انت شايف ان هو ده الصح ؟

انا : مش حكاية صح بس فى ظروف طارئة و مش حاقدر اعمل حاجة للأسف و قبل ما تغرق انت ادامك لغاية يوم الجمعة و ادينى بأقول لك من يوم التلات علشان تعمل حسابك ان حد تانى يكمل معاك

هو: طيب انا راضى كده؟

انا : اه انا راضى كده

هو : البنت اللى احنا عملنا ليها المشروع جابت امتياز و طلعت التالتة

انا : طيب كويس

هو : انا عايزك تاخد الخمسين جنية دى مكافأة من البنت ليك

انا: انا حلفت انى مش حاخد حاجة غير حق المشروع اللى خلص و بس

و خلص الحوار على كده و نزلت من المقطم و انا مبسوط قوى ان الحوار خلص على قد كده
انا كنت متأكد انى بأذن الله كنت حاعرف انى اخلص المشروعين التانيين برضة فى الوقت المحدد بس الكلام اللى قالوا
المرة دى ضايقنى و كان فى كلام قاله المرة اللى فاتت بس مش مهم انى اقوله بس انا ما احبش ان حد يركبنى او يتنطط عليا

زميلى اللى فى السعودية قال لى : يابنى ما ترفضش الشغل ده ما دام فيه فلوس و خبرة و حا تتعرف فى السوق و احسن بدل السرتنة فى البيت

بس لو كان كل الشغل الحر كده يبقى السرتنة اسهل و الذ بكتير

:D

موضوع التنطيط بين الشركات

هو بالنسبة لى موضوع مهم جدا و كنت بأتكلم فيه مع واحد زميلى لما رحت الكلية امبارح علشان رسالة الماجيستير بتاعتى

الموضوع ببساطة ان بقالى حوالى سنتين بأشتغل و لغاية دلوقتى اشتغلت فى 3 شركات بتاعت جرافيكس ( و ده اصلا مش المجال بتاعى ) وعايز اروح مكان تانى و ده لأسباب معنوية و الاسباب المعنوية بتختلف من شركة للتانية

يعنى مثلا الشركة الاولانية صاحبها كان بيأخر المرتبات لغاية يوم 20 الشهر اللى بعديه و خلى الاجازة مدفوعة الاجر 10 ايام بدل ما كانت 15 يوم و ده و انا اخد الاجازة بتاعتى وكلام كده زى ان ساعة التأخير بساعتين و ساعة الاوفر تايم بساعة و نصف و الكراسى متكسرة و الاجهزة طلعان عينها و الذى منه

الشركة التانية كانت عبارة عن اتنين كانوا بيشتغلوا معايا فى الشركة الاولانية و برضة كانوا متضايقين من الوضع فا قرروا انهم يعملوا شركة ليهم بس على ما يبدو ان واحد منهم شخصية صاحب الشركة الاولانية طفحت عليه فا حط عيوبه و عيوب صاحب الشركة الاولى فى شخصيته و عمل شخصية اسوأ من الاثنين

الشركة التالتة بقى كان نفسى اشتغل فيها من زمان بس انا كنت بأسمع ان صاحبها مش بيرضى بأى حد فا لحفظ ماء الوجه ما حاولتش انى ابعت "السى فى " بتاعت ليه بس لما صاحب الشركة التالتة عرف انى حاسيب الشركة التانية كلمنى علشان اقابله وقال لى اننا حنبقى سعداء لو بقيت واحد من الفريق بتاعن (جدير بالذكر ان واحد من الفريق ده كان برضة بيشتغل فى الشركة الاولانية برضة و طفش منها )
بس انا فضلت قاعد بقالى 3 اشهر بأعمل حاجات ما بتدخلش فى المشاريع بتاعتهم و لما اتكلمت مع صاحب الشركة طمنى و قالى احنا بس مشغولين الفترة دى و مش عايزك تقلق خالص و ما يهمكش اى حاجة
اما بالنسبة للشباب اللى قاعدين معايا لاقيت انهم معتبرين انى جاى كده و ماليش اى لازمة لدرجة ان فى واحد منهم قال لصاحب الشركة على المشروع اللى أنا شغال فيه " ده تهريج و انا مش حاسس بأهمية المشروع " انا قررت انى مأتكلمش امام صاحب الشركة و سيبته يرد عليه

نرجع بقى لزميلى اللى كنت بأتكلم معاه فى الكلية

قال لى :"اثبت فى مكان بقى و بلاش تنطيط من شركة للتانية و سيبك من الناس دول " وزميلى ده دفعتى و كان قاعد فى شركة لمدة السنتين اللى فاتوا لغاية ما الشركة قفلت

قلت له : انا خلاص شايف ان موضوع الجرافيكس فى مصر موضوع يقرف اى نعم هو بيجيب فلوس كتير بس تعب نفسى

قال لى : احسن انك تفكر فى الشغل بدل ما تقعد تفكر فى الحياة و قرفها

انا: انا ناوى انى اكمل الماجيستير بتاعتى و بعدين الدكتوراه و اكمل فى المجال الاكاديمى (مجال علوم الحاسب )

هو:بس الفلوس حاتبقى قليلة

انا: حابقى احاول اسافر برة

هو: ولغاية ما تاخد الدكتوراة ؟

انا : حاكل *** ما فيش حل غير كده

هو: متأكد انك حاتقدر تستحمل و تأكل *** ( وبص كده بصة مكر كده معناها انى مش حاقدر استحمل

انا : مش عارف اذا كنت حاقدر استحمل ولا لأ

ووصلنا لأستناج مفهوم غير مسموع انى حاوصل لدرجة و حاخد بعضى و امشى و مش حاستحمل

فترة من السعادة

انا مش مصدق نفسى

بقالى يوم (من امبارح اول ما صحيت) لغاية هذه اللحظة وانا مبسوط ... فعلا انا مش مصدق نفسى
امبارح انا كنت مرهق جدا لدرجة انى مش قادر افكر او افتكر حاجة تضايقنى على عكس الاسبوع اللى فات كنت بافكر فى حاجات كتير و متضايق من بنى ادمين كتير (يعنى تقريبا كل البنى ادمين اللى حواليا) بس لاقيت انه على الرغم انى مرهق جسديا الا انه كنت مرتاح نفسيا لفترة و السبب انى تقريبا نسيت كل حاجة و مش قادر افتكر غير اللحظة اللى انا عايشها

و تقريبا دماغى اخدت على كده وانا النهاردة مرتاح نفسيا و جسديا و مبسوط .... تلاتة فى واحد برت بلاس قاهر القشرة

كنت زمان بأتكلم عن ان الالم النفسى اشد بكتير من الالم الجسدى .... بس الكلام ده كان نظرى و دلوقتى بقى الكلام عملى و فعلا الكلام ده مضبوط

شئ جميل جدا انك ما تفكرش فى المستقبل (طبعا بجرعة مضبوطة مش زيادة عن اللزوم ) و انك تنسى الماضى ( يعنى يفضل الحاجات الوحشة بس علشان انا مش قادر اقول قد ايه انك لما تفتكر الحاجات الحلوة اللى فى الماضى بيبقى ليك نفس انك تكمل فى المستقبل بنفس ) صدقنى

و اهم حاجة من الثلاثة هو الحاضر ...... خليك معاه على طول الخط علشان ده الحاجة اللى في ايدك تغيرها على عكس المستقبل و الماضى و انا حاسس انى كنت سايب للماضى المقرف مساحة اكبر من الحاضر و المستقبل لدرجة انى كنت اسير فيه مش عارف اتحرك حبة للأمام

زميلى اللى فى السعودية قال لى حاجة حلوة قوى " الدنيا دى غريبة قوى بتشوف ايه اكتر حاجة انت بتكرهها و مش عايزها تحصل و بتجبهالك ملفوفة فى هدية "وده طبعا قمة الحلاوة

على العموم انا حاسس ان عقلى لقى ملجأ للراحة اخيرا و لو كان مؤقتا من القرف و الهبل و الجنان اللى هو كان عايش فيه و نسى شوية كأنه واخد استراحة من شوط و مستعد للشوط التانى

وانا حاسس ان الشوط الثانى حيبقى جامد جدا

فلترة البنى ادميين

الموضوع ده كنت اتكلمت فى انا وواحد صاحبى (هو النهاردة سافر السعودية علشان يكون نفسه وكده يعنى) من فترة كده يعنى يجى سنة ولا حاجة

الحكاية هى "فلترة البنى ادميين" او تعلم عليهم بالمصطلحات الشبابية العامة

بكل بساطة ان فى فترة كده انت بتبقى تعبت من شرح وجهة نظرك و مش محتاج انك تفهم حد الكلام اللى انت بتقوله معناه ايه و خصوصا انه بيفهم الكلام من الجانب السيئ فقط وسواء ان فهم او ما فهمش بتبقى قرفان انك تبص فى وشه

او مثلا فى بنى ادم عرفته عن طريق واحد تانى و البنى ادم الواطى ده يفضل يجيب فى سيرتك طول القعدة ويقول كلام عليك و يقعد يتريأ عليك فى كل كلمة بتقولها و انت ساكت و عامل اعتبار لصاحبك بس وصلت لدرجة انه كفاية بقى و خصوصا ان صاحبك ده خلاص قرب يسافر فا مابقاش فى داعى انك تسمع كلام يقرفك تانى

او واحدة بايرة اتحسبت عليك انسانة انت حاولت انك تساعدها فى شغلها و دايما بتسألك على حاجات المفروض انها تعرفها لأن ده شغلها وبعد كده تكون انسانة ناكرة للجميل

فى حاجة كمان اكتشفتها قريب : انك برضة لو تقدر تفلتر اهلك برضة يبقى يا حبذا و خصوصا لما يبقى ليك اخ افتكر ان الرجولة بالعضلات و انه كل ما عضلاتك كبرت صوتك يعلى

او اختك يوم لما بتبقى اجازة و نفسك تتفرج على التليفزيون كل شوية تطلب منك انك تحول على الفيلم علشان هى بقى لها 500 مرة اتفرجت عليه و نفسها تتفرج عليه كمان مرة و لما تقول لأ تعيط و امك تقول لك ان اختك بتكره اليوم اللى انت بتاخد فيه اجازة علشان مش بتعرف تتفرج على التليفزيون

حسيت انى بقيت بالنسبة لأختى زى ابويا : باخنق عليها فى حياتها و لما اطلب منها حاجة تعملها و انا موجود و متعملهاش و انا مش موجود

ده خلانى انتبه لحاجة مهمة جدا : ان البنت دى و انا عندى 23 سنة وهى عندها 8 سنين عندنا مشاكل مع بعض و المشاكل دى ممكن تكبر جدا لما يبقى سنها مثلا 22 او 23 سنة و انا يبقى عندى مثلا 37 او 38 سنة وهى انها نفسها تتجوز واحد ابن كلب و انا مثلا مش موافق
ياترى هى ساعتها حاتعيط برضة ولا حاتتزوجه عرفى ...... الله اعلم

بس انا في حاجة انا عارف انها ممكن تفرقنى قوى بينى و ما بين والدى وهى انه هو اللى اختار انه يعمل عيلة و بعدين قرر انه يبقى زى اى جبان انه يتخلى عنها

بس انا ما اخترتش اى حد فيهم يعنى الست اللى بأسمع كلام زفر من فمها وما بتفهمش دى ما اخترتهاش والدتى او سى السيد اللى شاطر انه يتفرج على الستات الوسخة و يتكلم معاهم و يصاحبهم ودايما يرمى غلطاته على اللى حواليه و حلو قوى عنده انه يرمى فلوسه فى الرشوة عن انه يصرف على ولاده هو كمان ما اخترتهوش انه يبقى والدى

و لا اخويا اللى كل همه انه يأكل علشان عضلاته تكبر و يبقى بطل فى كمال الاجسام و العضلة الوحيدة المهمة اللى بتفرق ما بين البنى ادم والحيوان بتضمر عنده و مالهاش عنده تمارين

و الاخت المنافقة من صغر سنها و ده يديلها طبعا شهادة خبرة فى النفاق منذ سن 8 سنين او اكتر شوية
انا فى موقف انى بأضحى بحاجات مهمة بالنسبة لى فى سبيل الناس دول بس لاقيت ان ما ينفعش ان اضحى علشان ناس ما يستاهلوش

كفاية قرف

الناس دول عاملين زى اى حاجة فى الدنيا ليهم فوائد و ليهم اضرار بس زى الخمرة و القمار اضرارهم اكتر من فوايدهم

فا فى ستين الف داهية

الناس دول كلهم انا ما اخترتش انى اعرفهم بس انا كان نفسى انى اعرف ناس احسن منهم بشوية
هل اللى انا بأطلبه ده كتير ؟ مش عارف

انا عارف انه فيه أسوأ ...... ماشى بس ليه ؟ ايه الفكرة ان البنى ادم يبقى أسوأ مش احسن

انا ما قلتش انى كامل و انى ما فيش فيا حاجة وحشة بس انا برضة مش عايز حاجة من حد و عايز الناس تسيبنى فى حالى و اعيش لوحدى احسن لأن تجربة الارتباط دى عواقبها وخيمة وانا مش عايز اعمل زى والدى الجبان المعتوه اللى طرد اهله من بيته

و المسئولية و الكلام الحمضان اللى بالشكل ده عبارة عن قناع لشئ اخر اسمه القرف اللى لا مفر منه لأنك لو لاقيت مفر يبقى انت بنى ادم غير قادر على تحمل المسؤلية

يعنى لما بنت تتبجح كده و تتكلم على واحد جه يتقدم ليها تقول " اصل بابا رفضه لأنه شاف انه مش حايقدر يتحمل مسؤليتى" ممكن نحط بدالها كلمة " قرفى " ....... ساعتها تبقى الجملة منطقية

لأن المسئولية معناها :انك تستحمل ناس تقرفك فى عيشتك طول عمرك و ما تقولش كفاية
مش اكتر

فى اوقات مرت عليا كنت عايش لوحدى كانت احسن بكتير من انى مخنوق فى بيتى مع 3 بنى ادميين ما يفهموش معنى الخصوصية و امتى يتكلموا و امتى يسكتوا

حاسس ان المصريين بقوا عاملين زى منتجاتهم اللى هى سلعة رديئة وسعرها غالى على الفاضى

ما اعرفش اذا كان المصريين بس هما اللى دلوقتى بقوا كده بس و لا كل البنى ادميين اللى على الكرة الارضية

بنت و عليها ثلاثة هدية

حوار حصل ما بينى انا وواحد زميلى

هو : يابنى الطلب زاد على صنف الرجالة و البنات بيقدموا عروض بالهبل

انا: هو احنا بيقنا بضاعة طيب ينفع اخد بنتين و عليهم واحدة هدية

هو : طبعا بس لو لاقيت قل لى و انا حادور فى كارفور المعادى و اسبينيز

انا : فى فكرة فى دماغى . لو كل واحدة ليها ثلاث صاحبات قوى اول ما بتلاقى عريس م بتعرفهمش ليه ما يبقاش مشروع قومى مشترك كبير قوى يبقى هو يتزوجها هى و ثلاث صديقاتها

هو : قشطة ماهو صاحباتها طول النهار مع بعض .... مش فارقة كتير

انا : قشطة يبقى ما زعلناش حد

هو: بس انت بقى حاتجيب شقة 12 اوضة منين

انا : مش عارف بس فى حاجة فى دماغى

هو : ممكن تعمل مزرعة

انا : تبقى كل واحدة ليها دور وفى اوضة ليك لوحدك و تدخلها و تانى يوم تخرجها من الاوضة دى

هو : قشطة يعنى اوضة الشغل

انا : اوضة المشروع

هو : ده مشروع عظيم

انا : بس و بكده يبقى انت بس مش عايز غير ثلاث اوض , اوضة ليك , و اوضة للفراخ , و اوضة للاولاد

هو : معمل تفريخ العيال , طيب ما نعمل اعلان فى الوسيط

انا : وليه لأ

هو: و نشوف رد الفعل

انا : قشطة و بما انهم اصحاب ما مش حايزعلوا وحيفضلوا طول الوقت بوزهم فى بوز بعض

هو : و عايزين نعمل ايميل للرد عليه

انا : اعمل ايميل على الجي ميل و يا حبذا لو كانوا بيشتغلوا

هو : ده شرط يابنى

انا : زى فيلم محمود عبد العزيز بس العصمة فى ايدك يا حلو

هو : بس احنا لازم نكون بنقبض اكتر منهم

انا : نقبض اكتر منهم ولا لأ مش مشكلة . انت بتصرف على البيت على قد مرتبك. عايزين هما يحطوا حاجة فى البيت براحتهم . انما هما مسئولين منك فى الاكل و دايما لازم تجيب عروض من السوبر ماركت زى مترو مثلا او سبينيز يعنى بد كيس الشيبسى الصغير تجيب عائلى

هو : علشان تكفى

انا: بالضبط, و بدل صابونة.... دستة صابون و كارتونة بيبسى و هكذا

هو : اهم حاجة الصابون علشان الزفلطة

انا : يابنى ده احسن مشروع عملناه من ساعة لما دخلنا الكلية و لا تقول لى مشروع تخرج و لا بتاع

هو : ايه رأيك نبدأ نعلن عنه فى الكلية

انا : قشطة بما ان نسبة الفراخ بتكتر فى الكلية نعمل مشروع داجن فى الكلية و نعمل اوضة للمقابلات ويأما تاخد البت بصاحبتها يابلاش

هو : ده الشرط الاساسى

انا :علشان افرض انك اخترت بنات مش بيطيقوا بعض حترجع البيت حتلاقى فى اطباق سفرة تطير فى الهواء

هو: لأ ماهو فى 3 اشهر اختبار

انا : ما ينفعش يبقى فى تدريب يا حلو يا اما صاحباتها يا بلاش و بعدين العمر ما فيهوش 3 اشهر علشان تجرب كل مجموعة على حدة. ممكن تعمل لك جدول مقابلات طول اليوم

هو : طيب نعمل اختبار اتش ار جامد فى الاول و نجيب ناس متخصصة

انا : لو جبت واحدة من الاتش ار يبقى مش حاتتجوز غير البت بتاعت الاتش ار, و حاتقول لك انا الاتش ار يا حلو يعنى انا لوحدى يا بلاش

انتهى الحوار و لا اعرف اذا كان له جزء ثانى ام لا و لو كان له يبقى ممكن يكون:

" وضع اسئلة المقابلة ....لمعمل تفريخ العيال الداجنة "

و شكرا

حال كل المصريين .... زى حالى و العكس صحيح

النهاردة و انا جاى الشغل عديت على النصب التذكارى بتاع حرب اكتوبر

قعدت يجي ثانية كده ابحلق فيه كده هو والصورة اللى الظاهر انهم صوروها من البانوراما و حطوها ورا النصب التذكارى و افتكر حرب اكتوبر

طبعا انا ما حضرتهاش لأنها كانت قبل ما اتولد ب 10 سنين و حتى لو كنت اتولدت ساعتها ما كنت حافتكرها بس ما علينا

طبعا اباءنا اللى حضروا حرب اكتوبر بيقعدوا يمجدوا فى نفسهم لأنهم كسبوا الحرب و الاسرائليين ولاد الابالسة اللى هما كانوا مطلعين اشاعات انهم مخلدين و مش بينزفوا و ان حصن او خط بارليف هو خط مالوش ولا نقطة ضعف ( و ده طبعا ما فيش بنى ادم بيفهم ممكن يصدقوا ببساطة لان اللى صعنهه مش خالى من الكوليسترول ... اسف اقصد خالى من العيوب )

بس اباءنا طبعا صدقوا وزى ما ناس كتير دلوقتى موجودة عندها عقدة الخواجة و بيحسوا ان الاجانب اتخلقوا من طينة و احنا من طينة تانية لا يمكن الطينتين يتساووا ... ده خلى عندهم احساس بأنهم عملوا اعجاز بأنهم هزموا ناس ما يتهزموش ولا بعد الف سنة لأنهم يعتبروا ألهة الحرب فى العصر الحديث

و بعدين جه موضوع الثغرة اللى كل الناس مش عارفة ايه هو بس كل اللى يعرفوه ان دورها ان اسرائيل ابتدت تظبط نفسها و كان ممكن انها تقلب ترابيزة الحرب بالمشاريب اللى عليها على المصريين و يعتبر الانتصار عبارة عن وهم

جه عمو السادات قال انا مستعد احط ايدى فى ايد الشيطان لو كان ده فى مصلحة بلدى ..... و بالفعل هو ده اللى عمله عمو السادات و هو انه لما كان عبد الناصر حاطط ايده فى ايد الشيطان الاحمر و هو الاتحاد السوفييتى قام مات و هو ايده فى ايد الاتحاد السوفيتتى و قبل ما السلام يبرد راح السادات شايل ايد عبد الناصر و حاطط ايده بدالها وبعدين لما جت حرب اكتوبر راح حاطط ايده فى ايد الشيطان المقلم اللى اسمه الولايات المتحدة و قطع ايد السوفييت و كانت جزاته ان واحد سلم عليه برصاصة خلته ينزف لحد ما يموت.... المهم

طبعا عمو عبد الناصر و تحتيه الشيطان الاحمر

ده بقى عمو السادات و تحتيه علامة الشيطان المقلم

اللى انا وصلت له و انا فى الثانية اللى بصيت فيها على النصب التذكارى ان حرب اكتوبر دى هى الحال بتاعنا دلوقتى و هو اننا دايما عمرنا ما بنوصل لدرجة اتقان عالية تخلينا ما نعتمدش على حد بس بنقول " احنا فضلنا قاعدين لحد النهاردة مطبقين والحمد لله ان الشغل العملاء قبلوه .... بس احنا لو كنا اخدنا وقت اكتر شوية كنا ممكن نعمل احسن من كده " و الجملة دى باسمعها من كل الناس فى جميع انواع الشغلانات اللى ممكن البنى ادمين يشغتلوها و اللى هما مش بنى ادمين برضه

فا وجه التشابه الاول اننا كنا على وشك اننا نعمل فعلا حاجة ما حصلتش بس اكتفينا بأننا نقول ان لولا الثغرة كنا كسبناهم و اننا نرمى اللوم على حاجة كانت لازم تتحط فى الحسبان و ان القيادة السيئة مش لازم تتبع فى كل الاوقات و في اوقات لازم احنا اللى نأخذ القرار بنفسنا

وجه التشابه الثانى هو اننا قعدنا بعد حرب اكتوبر لغاية دلوقتى ماعملناش حاجة تذكر و فضلنا مأنتخين على المؤخرات بتاعتنا و فخدنا على رأى المصطلحات الشبابية اللى احنا اخترعناها فى وقت الانتخة و رضينا بأننا نفضل حا طين ايدنا فى ايد الشيطان المقلم و قاعدين نقول احنا مش اده فى الوقت اللى فى بلاد كتير قالت له لأ و البلاد دى بتشكل خطر على الشيطان المقلم كل ما بيزيد عددها و الامثلة كتير فا ميش فايدة من انى اكتبها

انا متخيل ان السادة القراء تاهوا و ما فهموش ايه وجه التشابه بس لما تقرأوا الباقى حا تفهموا

و البلاد دى تطورت كتير فى الوقت اللى احنا فضلنا مفخدين فيه و كلنا عندنا نوع من الرضا النفسى اننا لو اتحركنا و قمنا من الانتخة دى هوب حانبقى فى مستوى البلاد اللى ازدهرت دى ده لأننا مصريين و المصريين هما احسن شعب و كلام من ده و ...... الخ , الخ

و اللى احنا وصلنا له حاليا من وضع الانتخة المريح ده اننا عندنا اكثر من 48 فى المائة فقراء و زيادة البطالة و طبعا حانرمى اللوم على الناس اللى قاعدة تخلف زى الارانب و حانقول ان زيادة السكان هى المشكلة متجاهلين الصين و الهند و اعدادهم المهولة و حنتجاهل تانى انهم متطورين علميا و من اقوى الشعوب حاليا

و زيادة السيارات اللى المفروض ان لو لقوا حد واقف صف تانى ( مع اعتذار لاصحابى اللى عندهم سيارات بس هو ده اللى لابد منه ) يأما ياخدوا سياراته يأما يعملوا اى حاجة فيه

ولو كان في سيارة عطلانة فوق كبرى اللى هو المفرض عملوه علشان يحل ازمة المرور و اصبح صاحب السيارة العطلانة هو السبب فى عطلة بقيت البنى ادميين اللى فوق الكبرى انهم يرموا سيارته من فوق الكبرى

و زيادة العقد النفسية اللى عاملين ليها اعلانات فى الشارع " المرض النفسى زى اي مرض له اعراضه و علاجه " و نسينا ان اعلان زى ده ماكنش لو وجود من فترة قريبة

و ان الامراض النفسية ولدت ضباط شرطة ساديين و بنات معقدة نفسيا و البنت من دول بتوصل لسن بيدولها لقب عانس علشان يبقى عقدها النفسية رسمية و مسموح ليها بانها تعمل ايه حاجة لأن الاسم اعتمد بشهادات رسمية

وفى بنات تانية بيبقى نفسها تتجوز اى بنى ادم المهم انه ينشلها من الفقر و اليأس و الهم و لما تلاقى انها خلاص المشاكل دى اصبحت فى طى النسيان و انها شبعت اكل و اغتنت تبتدى تطور المشاكل بتاعتها وهى انها تبتدى تدور على الحب اللى هو واحد فقير بيعرف يديه ببلاش و تصبح الخيانة موضوع شرعى لأن المرأة معذورة ووصلت لمرحلة انها ما تعرفش لا تستغنى عن الطفح و لا عن الحب

و ان فى شباب كتير قاعد يحشش من الاكتئاب و اليأس بسبب البطالة يأما بسبب الزواج اللى مايقدرش عليه فا يأما يقضيها
زنا على رأى و احد صاحبى يأما يتزوج عرفى يعنى برضة الموضوع حرام فى حرام

و الشباب اللى بيسافر علشان يهرب و يلاقى ان بقيت الشعوب و الاجناس اللى حواليه بتحتقره و مش بتحترمه و بتعامله اسوأ معاملة لأنه ببساطة ..... مصرى

و ان في شباب زى مثلا بقوا مخنوقين من كل اللى حواليهم و نفسهم انهم يهدوا المعبد عليهم و على اللى حواليهم لأنهم سبب فى معاناتهم واصبح موضوع هد المعبد ده مسألة وقت مش اكتر وان التوقيت المناسب هنا هو ازاى انه يهد المعبد على اكتر عدد من الناس اللى حواليه و ان مهم بالنسبة له انه ينتقم من الناس الى قرفوه فى عيشته حتى لو كانوا اقرب الناس ليه

ويا جماعة لازم تفكروا ان اللى بتزرعوه لازم فى يوم تحصدوه

What goes around, comes around

المهم انكم دايما لازم تفكروا ان النصب التذكارى هو رمز للأنتخة و أن النصب التذكارى عبارة عن واحد حاطط ايديه و
رجليه على الارض و قاعد بيتشمس

و شكرا