ايديال او الخراب المستعجل و قصص اخرى

الناس دلوقتى بقت ما بتشتريش الحاجة من غير الضمان

الضمان ده ما كانش حاجة متوفرة بكترة زمان وده لأن الناس كان عندهم ضمير فى الحاجة اللى هما بيبيعوها بس على ما يبدو ان البائعين تعبوا من الموضوع بتاع الضمير ده و قرروا انهم ينهوا المسألة دى بموضوع الضمان

و الضمان عندنا فى مصر بأختصار : انى اضمن لك ان الحاجة اللى انت تشتريها مش بتشتغل بس احنا طول فترة الضمان بنوعدك اننا نفضل نصلح فيها ( او فى بعض الاحيان ناخدها و نديك حاجة اسوأ منها ) لغاية بعد ما فترة الضمان تخلص ساعتها يفضل انك ترميها فى الزبالة و تجيب حاجة تانية بدالها علشان لو انت حاولت تصلحها بعد الضمان حاتدفع تقريبا نصف ثمن الجديدة تقريبا

و الكلام ده انا مش بأجيبه من عندى لأنى قاعد فى شقة مفروشة ( وليه .... دى حكاية يطول شرحها) .... المهم احنا لاقينا ان الثلاجة الجامدة جدا اللى اسمها ايديال بطلت الشغلانة اللى الناس اصحاب الشقة المفروشة جابوها علشانها وهى انها تتلج الحاجة اللى فيها

فا كلمنا الناس بتوع الثلاجة قالوا لينا " احنا ما لناش فيه" الضمان بتاعكم خلص و لازم تغيروا الهيكل بتاع الثلاجة كله " والدتى سألت طيب ده يتغير بكام قالوا ب 800 جند فقط لا غير ( طبعا و ما تنساش الشاى والاصتباحة والذى منه) فا لما والدتى قالت لى الكلام ده قلت ليها طيب و ليه العذاب ده نحط على الفلوس دى كمان 800 جنيه و نشترى ضمان بالثلاجة بتاعته و نرمى الثلاجة دى فى وش اللى جابوهم علشان احنا ايه اللى يضمن لينا ان الثلاجة بعد ما يندفع فيها 800 ما تفضشل عطلانة (قبل كده عملت نفس الحركة و جه واحد قال عايزة تتشحن فريون و بعديها بأسبوعين او شهر اتنيلت تانى ) و يدفعونا كمان 800 جنيه و"هكذا" على رأى ريكو

فا لاقينا و سيلة اننا ننقذ نفسنا من الخراب المستعجل وهى اننا نسرق الحرامية اللى عايزين يسرقونا بأننا نعمل فاتورة ( وده بناء على تعليمات واحد من بتوع الصيانة اللى جه علشان يعاين الزبالة .... اللى هى الثلاجة بعد ما اصبحت مقلب للزبالة ) و الفاتورة دى تكون فى وقت قبل ما الضمان ما يخلص علشان تتصلح ببلاش

و لما قلنا ليهم احنا خلاص عملناها ما بصوش فى الفاتورة و اخدوا الثلاجة و صلحوها و رجعوها بعديها بيومين

طبعا كل اللى اقدر اقوله لأصدقائى انهم دلوقتى قبل ما حد ينزل يشترى حاجة علشان نفسه يتجوز ولا حاجة زى كده بأقول له اشترى الضمان الاول مش الحاجة علشان ده اللى ماشى دلوقتى فى السوق

حكاية الكومبو اللى انتى مش لازم تأكليه وانا أكله لأنى بحبه

فى اعلان عن ماكدونالدز عجبنى جدا ( فى ناس ممكن تقول ده لأنك متحيز للولاد ضد البنات و جايز يكون ده فيه شئ من الحقيقة فى الحقيقة ) و باختصار

الاعلان بيتكلم عن واحد بيحب واحدة قوى و بيعمل المستحيل علشانها لغاية لما دخلوا ماكدونالدز والبنت قررت انها تأكل من الكومبو بتاع الولد

ساعتها الولد قام بالدفاع عن وجبته المفضلة ووقع البنت من على الكرس بعد ما داست على رجله بالجزمة بتاعتها

فا البنت لاقيت ان شلكها بقى زبالة فاراحت قامت سايبة الولد باستهزاء قام هو برضة عمل حركة برأسه بتدل على قرفه منها

و بعد ما حكيت الاعلان بسرعة احب اقول وجهة نظرى ( اللى هى كالعادة مختلفة عن الاخريين وهذا بشهادة الكل) و هى

ان احنا (الولاد) بنعمل حاجات كتير للبنات بس ده مش كفاية بالنسبة ليهم لازم البنت يبقى ليها السيطرة الكاملة على الولد يأما تسيبه وهو ده اللى عجبنى فى الاعلان ان فى حاجات لازم البنت تتقبلها و مش لازم انها تتدخل فيها وان الحاجات دى ليس لها علاقة بمقدار حب الولد ليها يعنى مش علشان فى وقت من الاوقات الولد مش بيقدر يلبى طلباتها يبقى كده هو مش بيحبها

طبعا انا مش بأتكلم عن الكومبو اللى انا بحبه ( بالمناسبة هو كان اسمه " انا احبه" لغاية تقريبا ما عرفوا ان فى واحد صاحبى لقى انها تمشى برضه انا احبه زى اللى فى "ابن الاحبه" فاغيروها له "انا بحبه" بس انا باقول انا ممكن شتيمة تطلع جديدة على ضوء "بحبه" و يبقى "ابن البحبه" ) .... ما علينا

كارت فيزا اليكترون ..... و الرسم الملعون

اللى فوق دى بتاعت بنكى المفضل اللى هو بنك باركليز اللى نفسى اعمل حساب فيه بس مش معايا فلوس

أخيرا عملت كارت فيزا اليكترون ( اصلى بصراحة كان نفسى اعمل كارت فيزا بس ما عرفتش فا قلت ادينى قربت شوية ) .... المهم

الفرق ما بين اليكترون و الفيزا العادية انك محدود بس بالفلوس اللى على الكارت على عكس الفيزا لأنك ممكن ليك انك تسحب فلوس على ضمان الكارت بس فى فترة سماح بتختلف من بنك لبنك علشان تسدد فيها الفلوس اللى دفعتها ( يأما حايشفطوا دمك نقطة نقطة ) ولازم تعرف انك ما تهزرش مع شركة شغلها الاساسى هو الفلوس لأنهم ممكن يأكلوك و انت حى على قرش انت سحبته منهم ... ما علينا

المهم انا اتحذرت من عامل فى البريد المصرى انى لو جربت اعمل كشف حساب حيخصموا منى 5 جنيه
فا طلعت برة مكتب البريد علشان اشوف الفلوس اتحطت فى الكارت لاقيت فعلا فى 200 جنيه فى حساب التوفير و الحساب الجارى 0 جنيه ( طبعا فى فرق ما بين الاثنين وهو تقريبا ان التوفير عليه فائدة بس ما تعرفش تشترى بيه و الجارى ما عليهوش فائدة بس بتعرف تشترى منه

فا انبسطت قوى و روحت البيت واحنا جنبنا بنك مصر قلت لما اجرب الكارت و رحت زى العبيط اجرب الكارت هناك فا طلبت كشف حساب على الحساب الجارى لاقيت الصراف الالى بيقول انى مش حاكمل العمليه دى و نفض لنفسك

قلت طيب لما اجرب حساب التوفير اللى انا حاطط فيه 200 جنيه فراح الصراف سكت حبة كده و بعدين ظهر لى على الشاشة " دلوقتى حسابك بقى 195 جند" حسيت انى حاقع من طولى و فضلت طول اليوم متضايق بسبب الحركة القرعة دى وسألت نفسى " ليه كشف الحساب 5 جنيه لازم تكون الورقة اللى انطبع عليها الكلام ده خامتها غالية قوى" و من ساعتها وانا حاطط الورقة دى فى جيبى علشان افتكر انها اغلى ورقة اشتريتها على مر الزمن و انها بطريقة غير مرئية ذكرى لموقف اتصرفت فيه بغباء و بأوعد نفسى انى ما اكرروش طول عمرى او طول ما الورقة دى معايا

جنيفيرا و لانسلوت و الملك ارثر اللى هما مثلث الحب المدمر

على الرغم من ان الملك ارثر عبارة عن اسطورة ولكن القصة بتاعته هو و زوجته الخائنة جنيفيرا و عشيقها الفارس لانسلوت من فرسان المائدة المستديرة ( فى المائدة المستديرة كلهم زى بعض يعنى ما فيش حد يعتبر رئيس القعدة فا بكده يبقى مقامه فى مقام ارثر ) تعتبر قصة حقيقية ونصادفها فى حياتنا العادية و دائما الست هى اللى معذورة ... ما علينا

القصة بتقول ان ارثر يعتبر مثل للفضيلة و الاخلاق والنبل والعدل و فى فترة كان لازم يسيب بريطانيا علشان كان في مسائل سياسية لازم يحلها و طبعا جنيفيرا كانت برضه مشغولة فى الفترة دى فى مسائل جنسية بحتة لازم هى برضه تحلها
و اكيد مش لوحدها لازم الفارس المقدام لانسلوت اللى هو كان سبب من اسباب انتصار ارثر فى كثير من الحروب يحل المشاكل الجنسية دى و مع مين .... مع امرأة الراجل اللى بيأكله عيش

المهم ارثر رجع البلد وبعدين ما كانش عارف اللى فيها لغاية لما كان فى اجتماع مهم لاحظ فيه تغيب جينيفيرا و برضة لانسلوت

فا لما اتأكد من الموضوع ده قرر انها يحرقها فا طبعا لانسلوت اتدخل و قرر انه ينقذها حتى لو حارب ارثر ذات نفسه


و زى ما انتم عارفين ان فى دايما ضباع فى الغابة مستنية لما الاسد يديلهم ظهره علشان ..... ياللا بلاش قباحة

ببساطة شديدة ارثر دخل فى معركة الناس اللى طمعانين فى جنيفيرا و الحكم وانتهت بموت ارثر بسبب الجروح بتاعته بعد ما ذبح الخائن اللى كان طمعان فى الحكم و اسمه "مورد رد" و دفنوا ارثر فى جزيرة اسمها "افالون" ... كلنا لها

بعد اما الراجل مات يا عينى برضة لانسلوت كان عايز يبوس جنيفيرا فوق جثة ارثر
وشكلها بتقول له بلاش لاحسن يصحى و يحطوا علينا

فى ناس كتير بيقولوا ان خيانة جنيفيرا هى السبب الرئيسى لسقوط المملكة العادلة بتاعت ارثر

الموضوع ده مش بعيد عن الحياة العادية لأنه لاطالما كان النزاع بين البشر على النساء و السلطة و الفلوس

المهم انا حطيت قاعدة علشان اكسب احترامى لنفسى فى المسائل اللى زى دى وهى " انى عمرى ما ادخل فى نزاع بسبب واحدة ضد واحد الا اذا الواحد انتهك القاعدة بتاعتى دى و لازم انى اعرفه القاعدة دى قبل كل حاجة علشان يبقى البادئ هو الاظلم" و ساعتها افقد احترامى لى و بالتالى اقطعه

و فى قواعد كتير قاعد اكتب فى النسخة البيتا بتاعتها و امل منكم انكم تساعدونى فيها

و شكرا

ر

عن الشيبسى....... والهبل المصرى

امبارح كنت مش عارف انام فاخرجت على الصالة وبعدين لمحت كيس شيبسى عائلى على الترابيزة بتاعت الاكل

طبعا انتوا متوقعين ايه من واحد ما عرفش ينام امبارح ؟ اكيد شوية تهييس بس تهييس قى الجون على رأى عامة الشعب (او طبعا اتمنى انه يكون فى الجون مش اوف سايد ولا حاجة من دى اللى متعب و ابو تريكه بيعملوها )

المهم ..... لأقيت الكيس بقى شكله جديد قلت و ماله ماهو كل حاجة لازم يبقى ليها "نيو لوك" بس هل هو ده المطلوب من صاحب شركة شيبسى ؟ انه كل لما يحس ان شوية البطاطس اللى زي الزفت مش بيجيبوا الارباح المتوقعة يقوم يطلب تصميم شكل جديد علشان شيبسى يجيب الربح المطلوب

لاحظت ان ده فيه تشابه كبير جدا ما بينه و مابين حاجات كتير فى مصر من المواطنين و الموظفين و الشركات حتى و طبعا اكبر شركة فى مصر وهى الحكومة ذات نفسها اللى هى شراكة اصيلة ما بين العائلة المالكة و العائلات ذات صلة القرابة للعائلة المالكة لمملكة مصر المباركية

واحنا من زمان قوى بنحب العادات و التقاليد و فيه ناس كتير وصلت لأعلى المراتب فى حب العادات والتقاليد لدرجة انا بصراحة بأسميها "العبادة" لأنهم لغوا حتة الزلابية اللى فى الجمجمة بتاعتهم اللى وظيفتها انها تحلل كل الظواهر و بناء على استنتاجات منطقية بتخلى الانسان يقرر ايه هو اللى غلط و ايه هو الصح

فا نيجى نبص نلاقى ان شيبسى (او يعنى دى اخرحاجة اعرفها ) طول عمره منتج محلى فقط و لا يصدر للخارج وان الناس لسه بتشتريه و بتقدسه واللى نفسى اعرفه ليه منتج ردئ زى ده مثلا ممكن انه يكون منافس ل "برينجلز" مع انه فرق السما من الارض مابين برينجلز و شيبسى على الرغم من انى متأكد ان شيبسى ممكن يوصل بنفس التكاليف لجودة برنجلز لأن برنجلز منتج احنا مستوردينه و طبعا لازم الجمارك تأخد حته من التورتة و تضاعف ثمن البرنجلز مرتين كأنها انتجته مع الشركة المصنعة ليه

طبعا المنافسة هنا مش الجودة المنافسة هنا على السعر يعنى شوف "برنجلز" ثمنه كام و شيبسى ثمنه كام يعنى من الاخر على قد لحافك مد رجليك يعنى ممكن تشترى كيس شيبسى ب 50 قرش و تلاقى فيه قطعة شيبسى واحدة فقط و حجم الكيس خس بقى قد ميكرو كيس شيبسى و بعد كده تجيب معاك ملقاط علشان تعرف تأكل

مشكلة المنتج المصرى انه بيبقى ردئ اكتر و اكتر و ثمنه بيبقى اكتر و اكتر و شكله بيبقى احلى من بره اكتر و اكتر

يعنى شكولاته مورو مثلا بقيت ب جنيه و ربع و لو بصيت على الكيس بتاعها حتلاقيه قد حته الشكولاته اللى جوة مرتين

وواحد كنت بأشتغل عنده قال لى " يابنى هو انت فاكر انك الوحيد اللى بيطبق فى المكتب ده حتى "بيكسار" بيطبقوا" (الشركة اللى عملت "توى استورى" و افلام كارتون كان اخرها "كارز") طبعا فى فرق كبير ما بين ان "بيكسار" تطبق و احنا نطبق ..... بأختصار هما لما بيطبقوا ليهم كل سبل الراحة اللى محتاجينها بينما احنا متوفر لينا كل سبل الشغل يعنى هما بنى ادميين و احنا حمير

فا وصل بينا الدرجة اننا بنتسخدم نفس كلام الناس اللى برة بس التطبيق بتاعنا مختلف تماما فا لما حد يقول لك ان فى ناس برة بيعملوا نفس الحاجة اللى انت بتعملها قول له او حتى قول لنفسك " لما تكون انت زى الناس اللى برة ابقى انا اعمل زيهم"

وبعدين بعد كل ده احنا مطالبين بأننا ندى لمصر حقها لأنها هى اللى علمتنا ببلاش(كأن فى حاجة فى مصر ببلاش) فى عصر كان فيه العالم كله بيلاقى الكتب على الارض زى الهند مثلا اللى هى سبقتنا بفراسخ و اميال فى التكنولوجيا وده بسبب الجيل اللى فوقينا و جهله و هو نفس الجيل اللى بياخرنا احنا كمان على اننا نعمل حاجة تخلينا نبقى على الاقل فى نفس المرتبة اللى كنا فيها بس احنا بقينا واقفين مكاننا فا تأخرنا كتيرو اصبح اللى عايز يبقى فى مكانه فى السباق اول حاجة يعملها انه يدوس على مشاعره و يهرب من البلد دى علشان مش حايقدر يقبل انه يدفن نفسه مع شوية ناس ما عندهمش ضمير لأنه مش لاقى فيها غير القرف و الفقر والظلم و اليأس ( الاربع حاجات دول ممكن نألف عليهم حاجة نوصلهم ببعض ونثبت زى الرياضيات انهم متغيرات ليها علاقة ببعض بس فى تهييسة تانية .... اسف اقصد مقالة تانية) للأسف

وكان فيه تشبيه حلو قوى كان تقريبا نجيب محفوظ وصف بيه مصر و تقريبا كان بالشكل ده
ان مصر هى سيدة اخذت ترضع صغارها و ظل الصغار يرضعون حتى جف الحليب منها و تبقى الدم وظلوا يرضعون الدم حتى لم يتبقى دم و اكلوا لحمها حتى لم يتبقى منها غير عظمها

واحد زميلى من ايام المدرسة قال لى "خلاص البلد دى ماعتش فيها حاجة" قلت له انا قدامك و قدام كل الناس اللى شايفنا دلوقتى بقول انه قريب جدا ان الناس الكويسين اللى لسه موجودين (وعاملين زى سلالة مهددة بالانقراض) حا يطفشوا من مصر و مش حيرجعوا تانى

فى النهاية كل اللى اقدر اقوله بعد لما كنت بأتكلم عن الشيبسى و الهبل المصرى .... لاقيت انى بأكلم نفسى

اتمنى انكم تكونوا فهمتوا حاجة منى

و شكرا

ر

نقطة أمل فى بحر من اليأس

كنت بأتكلم مع واحد زميلى منذ أول يوم من ايام الكلية وهو من الناس المجتهدة جدا وانا بصراحة بأحترمه جدا وهو بيشتغل فى شركة اى بى ام

فأكنت بأشتكى له من انى حاسس انى عايش زى الحيوانات و انى بأشتغل الصبح علشان بالليل الاقى اكل وانى ما ليش فايدة فى الدنيا غير كده

و كنا متفقين على انى لو فضلت كده و وجهة نظرى للحياة و طريقة تعاملى مع البنى ادميين كده يبقى فعلا مافيش امل انى الاقى هدف اسعى علشان احدده والسبب فى ده انى اتجرحت من فترة مش قريبة ولغاية دلوقتى انا مش قادر اخف منه ( والجرح ده معنوى مش مادى لأحسن حد يكون فاكر حاجة غير كده ) و لازم انى انساه

قلت له انه مهم بالنسبة لى انى ما انساش الحاجة دى لأنها زى ما تكون المفتاح اللى بيه اعرف اتعامل مع الشخصيات الزبالة دى كويس بعد كده و ما اندمش على انى حاتعامل معاهم بكل اللى اقدر عليه من قلة الادب و الوقاحة لأنهم للأسف ما بيخافوش غير من دول و انها خبرة لا تقدر بثمن

..... المهم فاقلت له ان مشكلتى الاساسية انى مش عارف اذا كنت حافضل عايش طول عمرى وحيد و حاسس انى لوحدى فى الدنيا ( طبعا ممكن ناس تقول امال اهلك بيعملوا ايه ) والوحدة هنا لأن فى أنواع من العلاقات الانسان بيحتاجها و بالعربى كده اذا كانت فى انسانة ممكن انها تقدره و تهتم بيه والذى منه فقال لى ان كل الناس اللى زى و زيه اللى مش مرتبطين حاسيين بنفس الحاجة انما اللى ارتبطوا عكس كده و طبعا اشك فى الكلام ده لأنى اتعلمت ان فى الحياة انك كل مدى ما بترتقى فى حياتك الشخصية بترتقى فى المشاكل و كل لما بتبقى فى حالة معينة يعنى مثلا اعزب بيكون ليك مشاكل معينة و لما بتترقى ل متزوج المشاكل بتترقى برضة و بعدين بتبقى متزوج ويعول وبعد كده ممكن تترقى انك تبقى يا مطلق يا ارمل و كل واحدة فى دول بيبقى ليهم مشاكل برضه بس مش حاندخل فيها و طبعا على رأس الترقيات كلها الموت !!!! و ما ادارك بقى مشاكل الاخرة اللى مش ممكن تتحل خالص

ووضحت له وجهة نظرى ان المشكلة بتتكون من ثلاثة ابعاد و هى الوقت و الفلوس و الانسة الصحيحة و طبعا لو ثبتنا اثنين منهم كأننا بنحل مسألة رياضيات (على الرغم من ان عنصر الوقت ده مش حاتعرف تثبته ابدا ممكن) يكون الحل اخد فترة طويلة من حياتك لدرجة ممكن تكون وصلت لمرحلة اللى هو السن فيه ما ينفعش تختار و ايه حاجة و خلاص

و برضه قلت له انى بصراحة منحاز جدا لأصدقائى اللى هما وقعوا فى اهالى ولاد كلب و بيتأمروا على البنى ادميين اللى بيروحوا ياعينى علشان يترتبطوا بالبنات اللى بيحبوهم

و بعدين يحصل ما لا يحمد عقباه بأن ناس تتأمر على مكان الشقة و ناس تتريأ على الهدايا و ناس تطلب مهر و شبكة خزعبليين و ناس تطلب قايمة و نايمة و مؤخر صداق سعره فى العالى و ناس عايزين ستائر بأربع ألاف جنيه و حاجات من دى

و ناس تقول للأخ من قبل لما تشوفه " كل شئ يابنى قسمة و نصيب" كأننا مثلا بدل ما كل واحد بيتجوز بنت لأ البنت بقت حتة من فطيرة كبيرة فيها حتت كتير .....أحم أسف اقصد بنات كتير وكل واحد معاه اللى ينفع يأخد بيه اكبر حتة ( يعنى هنا احسن بنت فى الجمال و و فوول أوبشن يعنى من الاخر كده موديل 2007 و متعدلة علشان تعرف تلعب عليها اللعب المنسوخة و كده بقى نبقى دخلنا فى بلاى ستيشن 3 ) ....... ما علينا

المهم فصاحبى سألنى " الكلام اللى انت بتقوله على ان الناس فعلا بتعمل الكلام ده مضبوط بس انت جربت تتقدم لحد ؟" قلت له لأ بصراحة و انا مبسوط ان لسه ما حدش قرفنى فى عيشتى بالشكل ده فقال يابنى الرسول صلى الله عليه وسلم قال " تفألوا بالخير تجدوه" و بعدين انت ما شفتش فلان و علان و فلان 2 و علان 2 و فلان 3 و علان 3 اتقدموا والمواضيع مشيت بسلاسة (طبعا مش هو ده اللى حصل بالضبط بس المواضيع دلوقتى لما بتمشى من اصله فى الاخر بيقولوا انها مشيت بسلاسة ) قلت له : مضبوط

فقالى : صعب انك تفضل ترهق عقلك بحاجة لسة ما حصلتش و لما تحصل ابقى ساعتها فكر فيها مش يمكن تقع فى انسانة كويسة و اهلها ناس كويسين قلت فى عقلى يمكن ما حدش عارف حاجة دلوقتى من البلد اللى رجليها فى رأسها والعكس صحيح

فعلا الانسان احسن له ما يعرفش حاجة عن الغيب لأنه لو الواحد قعد يدرس احتمالات كل حاجة ممكن تحصل ممكن عقل الواحد يقف و يعمل

ٍٍٍSHUTDOWN

ويفضل طول عمره مش عارف يعمل حاجة لأن كل حاجة تافهة و صغيرة فى حياة الانسان ليها احتمالات كتير جدا وممكن دراستها بس تأخد عمر الواحد كله

على العموم انا متأكد ان ممكن الواحد لو لقى يعمل ترقية لدماغه علشان تستحمل مصر والمصريات ممكن يعرف يعيش

وشكرا

ر

A Not Fresh - Restart or Reboot

ازيكوا يا جماعة

بقالى فترة كبيرة ما كتبتش فى البلوج يعنى الفترة دى بقالها حوالى سنة كده

على العموم ما علينا انا بس كنت عايز اتكلم فى حاجة لسه ملازمانى لغاية دلوقتى على الرغم من انى دى الشركة التالتة اللى بأشتغل فيها دلوقتى و عرفت ناس كتير وشوفت حاجات اكتر بس الحاجة دى فضلت شوكة فى ظهرى و مش عارف اطلعها .

سيبوكم من الاباء اللى طلعوا موضة جديدة الايام دى اللى بيخلوا اولادهم يصرفوا عليهم و لا الاباء اللى بيطردوا ولادهم علشان يذلوهم ويهينوهم نفسيا و معنويا

خلونا فى الحاجة اللى ارفتنا طول عمرنا و مش لاقيين ليها حل
والمشكلة دى انا بأصنفها انى مالهاش حل منطقى على الاطلاق

يعنى مثلا لو اتكلمنا على الاباء الرمم اللى بيذلوا ولادهم ممكن يجيلهم يوم و يموتوا

واى مشكلة ممكن تلاقى ليها حل منطقى ما عدا المشكلة دى
لانى المشكلة دى مشكلة غير منطقية بالمرة و المشكلة دى للأسف هى

البنت

اخر حاجة شوفتها كانت بنت عرفنى عليها واحد صاحبى على اساس الصداقة مش اكتر
وانا فعلا اقصد مش اكتر

المهم ان احنا اتقابلنا من فترة قريبة و حاولت اتكلم معاها

هى بنت على مايبدوا انها رقيقة و شكلها جميل

بس كالعادة عمرك ما تلاقى الحاجة اللى انت عايزها حاولت اتكلم علشان اتعرف عليها بس لاقيت فى سد غير مرئى ليا لما اتكلمت لاقيت ان اسهل و اتفه الحاجات اللى ممكن اتكلم فيها هى مش عارفة تفهمها لدرجة ان صاحبى اللى عرفنى عليها سألها انت عارفة هو بيتكلم عن ايه ؟ قالتله ما أنا مستنية انه يشرح لى

ساعتها انا حسيت ان فى كتلة من مادة صلبة ليها كثافة عالية و وزنها تقيل قوى وقعت عليا و عرفت انا المفروض انى اعمل ايه عرفت ان كل اللى اقدر انى اقوله هو كلام عن عصام كاريكا و شنكوتى و الواد اللى زى الباراشوت وان كان فى واحد فى المدرسة معانا فى المدرسة اسمه قاردون وكلام من الذى منه علشان ما اقلبش القعدة نكد لأنى لو فعلا كنت قلت حاجة كنت قلت يا فلان خلينا نقوم علشان انا مش حاقدر اكمل

المهم احنا روحنا وبعدين سألنى "ايه رأيك" قلت له بنت عادية جدا قالى يعنى مش فاهم قلت له انا حاسس ان مش عارف اتكلم معاها فا مش عارف اذا كنت ينفع ابقى صديق ليها تحكى له همها ولا لأ و خصوصا ان العبد لله له هم برضه و قرفان منه جدا

فارجعت البيت و قعدت قدام الكمبيوتر وحسيت انى مش عارف اتنفس أنى بأتخنق حسيت انى مش عارف اتعامل مع البنت الطبيعية المصرية حسيت انى منعزل عنهم لدرجة تخلينى مش قادر اتعامل او اتكلم معاهم حتى .لاقيت انه مافيش ارض مشتركة ممكن الواحد يقف عليها علشان يتفاهم معاها

فى الاخر حسيت ان ده كله غلطى حيست انى لو كنت اتفه من اللى انا فيه شوية و اهتماماتى بالاغانى او بالموضة و البنطلون الديرتى ولا الواد ابو جيل فى شعره اللى مبلط فى الديسكو كان ممكن اعرف اتعرف على بنات اكتر وساعتها كان سوء التفاهم اللى مابينى و مابين البنات كان يتبخر

بس خلاص فات الاوان وللأسف كنت حاطط ليا نموذج فى المدرسة انا فعلا مش لاقى زيه دلوقتى. كانت قمة فى الجمال و الذكاء حأ رمز ليها بأسم "دال" ده لأنه اول حرف فى اسمها بس للأسف انا كانت الظروف ما تسمحش انه يكون فى حاجة ما بينا غير الصداقة فقط

وسألت نفسى سؤال " ليه الحلو مش بيكمل" يعنى انا ما اقدرش اقول حاجة عن البنت اللى صاحبى عرفنى عليها لأنها بالنسبة لى حلوة جدا بس من ناحية التفاهم حاسس ان فى فجوة كبيرة قوى بس صاحبى حاول انه يقول لى "معلش اصل دى اول مرة تتكلموا مع بعض" ... يمكن

و انا مش بقول الكلام ده لمجرد انى لسه بأتكلم مع واحدة لأ انا أتكلمت مع كذا بنت بس لأقيت ان فيه عامل مشترك ما بينهم و هو حاجز التفاهم و ممكن ابقى احيكلكم على الحكايات دى بعدين

واكتر بلوج بصراحة قرفنى فى عيشتى كان بلوج اسمه
http://wanna-b-a-bride.blogspot.com

طبعا انتم حاتقولوا و مال البلوج ده و مال الموضوع . ساعتها ممكن اقول لكم ادخلوا و شوفوه و خصوصا مقالة عن الرقة والانوثة
على العموم انا حاحط اللينك بتاع المقالة علشان انا عارف انكم مش عايزين تدورا

http://wanna-b-a-bride.blogspot.com/2007/05/blog-post.html

المقالة دى فهمت منها ان المفروض ان الشاب اللى تعب فى انه يجهز نفسه ويجيب شقة علشان يتجوز على رأى محمود العسيلى " وخلاص العين حتنام بعد ليالى كتيرة سهرانة " للأسف حيضطر انه يضحى بأنه يتجوز انثى مسخ مافيهاش ريحة الانوثة والرقة و شكله كده حيتجوز ابن عمه أحسن زى ما اللمبى قال فى اللى بالى بالك لأن البنات خلصت و اتبقى مسوخ اشباه البنات لأن الحياة للأسف عملت من البنت المصرية مسخ لأ هى انثى و لا هى ذكر و لازم اللى عايز يتجوز يتقبل الحالة دى وينسى بقى انه ممكن يلاقى انثى لأنها انقرضت من على وجه امنا مصر الحبيبة يعنى بالمختصر المفيد " هو ده اللى في السوق " فطبعا ربنا يخلى لينا الاباء المتخلفين اللى خلفوا بنات بتتكلم بالطريقة دى لأننا وصلنا لأدنى مستويات التفكير و اعلى مستويات التعقيد والتعقيد قلب بهبل

و غالبا اولويز بالاجنحة هو السبب

و شكرا

ر

ملوحظة اخيرة : انا متأكد ان انا شوفت "دال" بدرى فى حياتى لسبب و اعتقد السبب هو ان "دال" هى الدليل على انى ممكن فى يوم الاقى البنت اللى بدور عليها طول عمرى