خدمة العملاء ...... لا تعليق

من حوالى كده اسبوع رحت علشان ادفع 3 فواتير ( فعليا هما فاتورتين و نص ) علشان الدى اس ال يشتغل لأنه كان مقطوع عندى بقى له شهر

انا ماكنتش دفعت شهر 4 و نص 5 (لأن النص التانى لينك قطعت الخدمة ) و شهر 6 فضل النت فاصل فيه
روحت فرع الميرغنى علشان اشوف ايه النظام لأنى لقيت النظام التوماتيكى بتاع لينك حاسب لى كمان شهر 6 انى ما دفعتش الاشتراك فيه
وكان لنا هذا الحوار التالى ...... احم بس قبل ما اقول الحوار فيه حاجة حصلت قبل الحوار ده و لازم تتحكى

أنا كنت مستنى واحد .... فى الحقيقة هما ثلاتة مش واحد بس اول واحد فيهم اخد وقت اربعة علشان المشكلة بتاعته مع خدمة العملاء

و الحكاية بمنتهى البساطة ان الاستاذ "ج" كان بيدفع بانتظام للمحصل اللى تبع شركة متعاقدة مع لينك لتحصيل الفواتير و فوجئ بأن عليه 7 او 6 اشهر ما ادفعوش و كالعادة لينك قطعت الخدمة

فا الراجل بتاع خدمة العملاء قال له انك فى شهور ما دفعتهاش فالراجل طبعا انكر الكلام ده و قال له انكم بعتوا ليا على النت ان كان فيه كذا شهر مجانا و الكلام ده كان فى الجرايد كمان

طبعا الراجل بتاع خدمة العملاء قال لأ طبعا فراح الاستاذ" ج" قال له طيب انا خلاص انتم مالكمش غير المبلغ الفلانى عندى لو عايزين ترفعوا قضية ابقوا ارفعوا

وبعدين طلب انه يسوى حق الرواتر فالراجل بتاع خدمة العملاء قال على المبلغ بتاعه وده كمان ماعجبش الاستاذ "ج "و قال له انى خلاص حاديلكم الراوتر لأنه بقى بيهنج و بايظ و احسن لى اشترى و احد جديد و سعره كمان ارخص

...........ما علينا

انا بقى روحت اتكلم مع واحد تانى من خدمة العملاء

انا : انا كان عندى مشكلة

هو: رقم التليفون بتاعك كام ؟

انا: ........ (قال النقط يعنى هى رقم التليفون

هو: الاستاذ ر.........

انا : ايوة

هو: ايه المشكلة

انا: انا كان فى شهرين ما دفعتهمش و بيعدين قلت حاجى النهاردة علشان ادفع الفواتير لاقيت انك حطيتوا شهر 6 كمان و انت كنتم قاطعين ال دى اس ال من يوم 23 5 2007

هو : مافيش مشاكل يا افندم انا ممكن ارحل لك الشهر ده و تدفع بقيت الفواتير عادى

انا : شكرا

هو قعد يكتب شوية على الكي بورد و بعدين بص لى وقال: حضرتك بس حا تدفع 30 جنيه علشان شهر 6

انا : طيب ما فيش مشاكل

هو: ممكن حضرتك تروح تدفع الثلاث اشهر شهر 4 و 5 و 7 و ثلاثين جنيه لشهر 6 فى الشباك اللى هناك وبعد لما تدفع ابقى ادينى الوصل علشان اسجل الرقم بتاعه

انا: طيب

روحت دفعت و بعدين رجعت له تانى علشان يسجل رقم الوصل

انا: طيب دلوقتى فى حاجة تانية اعملها

هو: لأ

انا: طيب الدى اس ال حايشتغل امتى

هو: على بالليل كده او كمان ساعتين ( مافهمتش ايه العلاقة بس حسيت كده ان ولا كلمة من اللى قالها بخصوص الدى اس ال مضبوطة

انا (مغلوب على امرى ) : طيب

و عايز فعلا اقول انى احساسى كان مضبوط و لما رجعت البيت الساعة 10 لقيت فعلا الدى اس ال لسه مش شغال فطبعا رحت اتصلت بخدمة الخرة تانى

انا: الو ايوة لو سمحت انا عندى مشكلة فى الدى اس ال

هو: رقم التليفون

انا : ........ ( تانى مرة علشان البيه

هو : ايوة يا افندم ايه المشكلة

انا : دفعت النهاردة فاتورة 3 اشهر و الدى اس ال قالولى انه حايشتغل النهاردة

هو: هى حضرتك ما ظهرش عندى الفاتورة حاتظهر عندى بعد 3 ايام

انا : مش فاهم هو مش المفروض ان برضه اللى فى خدمة العملاء هناك برضة يعرف الموضوع ده

هو: ايوة ياافندم بس انا ما ظهرتش عندى بس فى حلين للموضوع ده الاول انك تستنى ثلاث ايام ( احة اعتراضية غير مسموعة او مرئية) و التانى انك تصور لى الفاتورة و تبعتها على الميل او الفاكس

انا:طيب انا ماعنديش اسكانر

هو: مش مشكلة اى كاميرا

انا : طيب

نزلت ادور على سايبرمش فاكر اسمه باين حمادة ابح ولا حمادة يلعب عنده اسكانر ما لقيتش و رحت مركز اتصالات اسمه باين عباد الرحمن و لا نور الهدى و لا حاجة زى دى سألته على فاكس مالقيتش

رجعت البيت بخفى حنين و بعدين قلت طيب احاول اصورها بال ويب كام

صورتها كذا صورة و بعدين بعتها على الايميل و اتصلت بخدمة الخرة تانى

انا: انا بعت صورة الفاتورة

هو: ايوة انا شفتها هو حضرتك دول كذا فاتورة

انا: لأ هى الفاتورة نفسها بس علشان تشوف الارقام اللى فيها مضبوط

هو : ايوة بس حضرتك دول 315 المفروض فى باقى ( باقى شهر 6 ) بس هما دول ممكن يشغلوا الدى اس ال

انا : ما انا قلت له فى مركز الميرغنى ان شهر 6 ماكانش فى دى اس ال شغال فقال لى حاتدفع 30 جنيه

هو: يمكن تظهر عندى فى النظام كمان ثلاث ايام ( غالبا بيستخدموا الحمام الزاجل ) لو ماظهرتش عندنا (احيانا فى ناس بتصطاد الحمام الزاجل فا الرسائل ما بتوصلش ) ياريت حضرتك تشرفنا فى مركز خدمة العملاء علشان نحل المشكلة دى ( يادى النيلة

انا: طيب

هو : الخدمة حاتشتغل كمان كده نصف ساعة

انا: شكرا

بس و بعد اللى حصل ده لقيت فعلا الخدمة اشتغلت فى اقل من نصف ساعة ولقيت لينك بعتة لي رسائل علشان استطلاع الاراء و يشوفوا ايه رأى العملاء فى الخدمة

كل اللى اقدر اقوله عن استطلاع الاراء ان كان فيه سؤال بيقول : هل ترشح خدمة لينك دى اس ال للأخرين كان نفسى ابصم على كلمة لأ و بصمة عشر اصابع اليد و فوقيهم اصابع القدم كمان