قرار د. نظيف ......... مش نظيف

شهدت مصر فى الخمس سنوات الماضية ( اللى فاتت يعنى ) تقدم و ازدهار فى القطاع الحوسبى المعلوماتى من خلال الانترنت فائق السرعة مما ترتب عليه الكثير من البنين و البنات كتير على الشات و افلام الفحش تتكاثر ما بين عيال الحشيش البؤساء و القليل من تطوير صناعة البرمجيات ........ ما علينا

المهم دلقوتى ان شركات الدي اس ال زهقوا من الولاد الكتير اللى بيقعدوا ينزلوا افلام و اغانى و حاجات وحشة و فى الاخر برضه عايزين يستنفعوا لأن 256 كيلو بت فى الثانية بقت خيار الشعب و بحسبه بسيطة كده معتمدين على ان السرعة مش بتقل عن 25 كليو بايت فى الثانية يبقى بتعملك حوالى 60 جيجا بايت فى الشهر

طيب ال 256 ب 95 جنيه

قام ايه بقى ........ قام معالى السيد الوزير الاستاذ الدكتور المهندس احمد نظيف قال : قشطة احنا نعمل افتكاسة جديدة زى ما كل سنة بنفتكس علشان تطلع ميتن ابو الشعب

يعنى السنة اللى فاتت زودنا المواصلات 10 قروش زيادة ( اللى هى 25 قرش مقنعة ) و الشعب حيقطع فى بعضه و احنا قاعدين بعيد علشان 5 قروش و احيانا الربع جنيه كله

و لا الخمسة جنيه نظافة اللى متعلقة بفاتورة الكهرباء . مش عارف يمكن يكون فى علاقة ما بين الكهرباء والزبالة ؟ الله اعلم


السنه دى بقى حانعمل حاجة جامدة قوى ....... بدل ما الناس تدفع 95 جنيه و تنزل 60 جيجا من النت لا ياعم حنخليك تدفع 45 جنيه و تنزل 2 جيجا وبما انك كنت خروف قبل كده حانخليك خروف مخصى المرة دى و نعمل لك نظام شحن زى الموبايل و لما تحب تنزل حاجة من على النت خارج الحد المسموح بيه حا تدفع 8 جنيه على الجيجا بايت.......... ايه رأيك ادينا بنفعك ياعم بس ما تقولش لحد

و للناس اللى مش مقتنعين بالحسبة عندنا 25 كيلو بايت فى الثانية ( طبعا العادى 32 بس الشركات بنت الوسخة بتزود مشتركين و الظاهر بتقلل فى عدد الاجهزة اللى تستحمل عدد المشتركين الجدد )

25 فى 60 ثانية = 1500 كيلو بايت فى الدقيقة وتقسم على 1024 حا تبقى 1.46 ميجا بايت

طيب 1.46 ميجا فى الدقيقة طيب فى الساعة كام ؟ 87.6 ميجا بايت

و اليوم ؟ 2.1024 جيجا بايت !!!!

طيب حانحسب بطريقة ظريفة كده و نشوف النظام الجديد مع متطلباتنا القديمة

اول يوم حاتدفع 45 جنيه طيب و ال 29 الباقيين نجرب كده ....... واحد اتنين تلاته هوبا

لو عرفت 29 يوم حاتدفع فيهم كام 464 جنيه حاديلك منهم جنيه

يبقى حوالى كده 509 قول 510 جنيه ياراجل

يبقى بدل ما انت كنت بتدفع 95 جنيه على نفس الكمية حاتدفع بدالهم 510 يعنى كام فى المائة ؟ يعنى 5 مرات زيادة

مش بالذمة لو الشعب ده وافق مش يستحق يدخل موسوعة جينيز فى عدد مرات لبسه للسلطانية

انا فعلا اتضايقت من القرار ده لأنى كنت بأحترم د.نظيف قوى بس الظاهر انه عمل كده مرغم على امره علشان يعتق فى الوزارة . يمكن الحكومة على النت بتاخد اتاوة ؟ الله اعلم

بس بعد القرار ده يا نظيف شكلك فى نظرى ما بقاش نظيف و اتمنى ان بعد ما الناس تعرف ايه عواقب القرار ده ما يبقاش فى شكلك حته نظيفة لأنك حاتكون كلك بقع و لا ايريال ولا برسيل حينفعوك بعد كده و لا حتى جنيرال بتاع مدام نظيفة !!

لما نشوف ايه اخر الهبل اللى بيحصل و ربنا يستر