نقطة أمل فى بحر من اليأس

كنت بأتكلم مع واحد زميلى منذ أول يوم من ايام الكلية وهو من الناس المجتهدة جدا وانا بصراحة بأحترمه جدا وهو بيشتغل فى شركة اى بى ام

فأكنت بأشتكى له من انى حاسس انى عايش زى الحيوانات و انى بأشتغل الصبح علشان بالليل الاقى اكل وانى ما ليش فايدة فى الدنيا غير كده

و كنا متفقين على انى لو فضلت كده و وجهة نظرى للحياة و طريقة تعاملى مع البنى ادميين كده يبقى فعلا مافيش امل انى الاقى هدف اسعى علشان احدده والسبب فى ده انى اتجرحت من فترة مش قريبة ولغاية دلوقتى انا مش قادر اخف منه ( والجرح ده معنوى مش مادى لأحسن حد يكون فاكر حاجة غير كده ) و لازم انى انساه

قلت له انه مهم بالنسبة لى انى ما انساش الحاجة دى لأنها زى ما تكون المفتاح اللى بيه اعرف اتعامل مع الشخصيات الزبالة دى كويس بعد كده و ما اندمش على انى حاتعامل معاهم بكل اللى اقدر عليه من قلة الادب و الوقاحة لأنهم للأسف ما بيخافوش غير من دول و انها خبرة لا تقدر بثمن

..... المهم فاقلت له ان مشكلتى الاساسية انى مش عارف اذا كنت حافضل عايش طول عمرى وحيد و حاسس انى لوحدى فى الدنيا ( طبعا ممكن ناس تقول امال اهلك بيعملوا ايه ) والوحدة هنا لأن فى أنواع من العلاقات الانسان بيحتاجها و بالعربى كده اذا كانت فى انسانة ممكن انها تقدره و تهتم بيه والذى منه فقال لى ان كل الناس اللى زى و زيه اللى مش مرتبطين حاسيين بنفس الحاجة انما اللى ارتبطوا عكس كده و طبعا اشك فى الكلام ده لأنى اتعلمت ان فى الحياة انك كل مدى ما بترتقى فى حياتك الشخصية بترتقى فى المشاكل و كل لما بتبقى فى حالة معينة يعنى مثلا اعزب بيكون ليك مشاكل معينة و لما بتترقى ل متزوج المشاكل بتترقى برضة و بعدين بتبقى متزوج ويعول وبعد كده ممكن تترقى انك تبقى يا مطلق يا ارمل و كل واحدة فى دول بيبقى ليهم مشاكل برضه بس مش حاندخل فيها و طبعا على رأس الترقيات كلها الموت !!!! و ما ادارك بقى مشاكل الاخرة اللى مش ممكن تتحل خالص

ووضحت له وجهة نظرى ان المشكلة بتتكون من ثلاثة ابعاد و هى الوقت و الفلوس و الانسة الصحيحة و طبعا لو ثبتنا اثنين منهم كأننا بنحل مسألة رياضيات (على الرغم من ان عنصر الوقت ده مش حاتعرف تثبته ابدا ممكن) يكون الحل اخد فترة طويلة من حياتك لدرجة ممكن تكون وصلت لمرحلة اللى هو السن فيه ما ينفعش تختار و ايه حاجة و خلاص

و برضه قلت له انى بصراحة منحاز جدا لأصدقائى اللى هما وقعوا فى اهالى ولاد كلب و بيتأمروا على البنى ادميين اللى بيروحوا ياعينى علشان يترتبطوا بالبنات اللى بيحبوهم

و بعدين يحصل ما لا يحمد عقباه بأن ناس تتأمر على مكان الشقة و ناس تتريأ على الهدايا و ناس تطلب مهر و شبكة خزعبليين و ناس تطلب قايمة و نايمة و مؤخر صداق سعره فى العالى و ناس عايزين ستائر بأربع ألاف جنيه و حاجات من دى

و ناس تقول للأخ من قبل لما تشوفه " كل شئ يابنى قسمة و نصيب" كأننا مثلا بدل ما كل واحد بيتجوز بنت لأ البنت بقت حتة من فطيرة كبيرة فيها حتت كتير .....أحم أسف اقصد بنات كتير وكل واحد معاه اللى ينفع يأخد بيه اكبر حتة ( يعنى هنا احسن بنت فى الجمال و و فوول أوبشن يعنى من الاخر كده موديل 2007 و متعدلة علشان تعرف تلعب عليها اللعب المنسوخة و كده بقى نبقى دخلنا فى بلاى ستيشن 3 ) ....... ما علينا

المهم فصاحبى سألنى " الكلام اللى انت بتقوله على ان الناس فعلا بتعمل الكلام ده مضبوط بس انت جربت تتقدم لحد ؟" قلت له لأ بصراحة و انا مبسوط ان لسه ما حدش قرفنى فى عيشتى بالشكل ده فقال يابنى الرسول صلى الله عليه وسلم قال " تفألوا بالخير تجدوه" و بعدين انت ما شفتش فلان و علان و فلان 2 و علان 2 و فلان 3 و علان 3 اتقدموا والمواضيع مشيت بسلاسة (طبعا مش هو ده اللى حصل بالضبط بس المواضيع دلوقتى لما بتمشى من اصله فى الاخر بيقولوا انها مشيت بسلاسة ) قلت له : مضبوط

فقالى : صعب انك تفضل ترهق عقلك بحاجة لسة ما حصلتش و لما تحصل ابقى ساعتها فكر فيها مش يمكن تقع فى انسانة كويسة و اهلها ناس كويسين قلت فى عقلى يمكن ما حدش عارف حاجة دلوقتى من البلد اللى رجليها فى رأسها والعكس صحيح

فعلا الانسان احسن له ما يعرفش حاجة عن الغيب لأنه لو الواحد قعد يدرس احتمالات كل حاجة ممكن تحصل ممكن عقل الواحد يقف و يعمل

ٍٍٍSHUTDOWN

ويفضل طول عمره مش عارف يعمل حاجة لأن كل حاجة تافهة و صغيرة فى حياة الانسان ليها احتمالات كتير جدا وممكن دراستها بس تأخد عمر الواحد كله

على العموم انا متأكد ان ممكن الواحد لو لقى يعمل ترقية لدماغه علشان تستحمل مصر والمصريات ممكن يعرف يعيش

وشكرا

ر