فى رأيى : مشكلة مصر الان و وجهة نظرى فى حلها

المشكلة فعلا ان الانسان المصرى(غالبية الشعب) للأسف الشديد على الرغم من كل التعليم و التطور اللى "جاله" لحد عنده الا انه بيفضل الامثال الشعبية و اقوال الجاهلين من قومه و يعتقد انها الحكمة

و يعتقد ان الجد فى العمل هى رفاهية لا يقدر عليها و لكنه فى نفس الوقت مظلوم لانهم يرى ان الاخرين يحصلون على راتب مثله او اعلى منه و لايعملون مثل ما يعمل

وبصراحة انا مقتنع تماما ان مشكلتنا مش فى حكومتنا قد ما هى مشكلة فى شعبنا اللى غلب عليه رأى الجاهلين على المتحضرين

و دائما الناس شايفه التغيير فى شخص ذو سلطة مثل الوزير

بس كل يوم بأسمع عن محاربة وزير التعليم مثلا اللى هو فعلا من اكثر الوزراء اللى بيدهم مسؤلية حرجة جدا شايف ان كل الناس بتحاربه من الوزارة و ان الناس استريحت للفساد سواء بدرايتهم او من غير

و فى كذا وزير دلوقتى من الواضح انهم من افضل الرجال فى العالم بدليل استعانه الدول الاخرى بهم قبل او بعد وجودهم فى وظيفة الوزير و ينسب لبعضهم الفضل فى نهوض بعض الشعوب و لكن تشعر ان وجوده فى الوزارة "زى قلته" ياترى ايه السبب هل فيه و لا فينا ؟؟

شعبنا فعلا غرق لشوشته فى الاشعار و النفخ فيه و بيحب يسمع تامر و نانسى و يعرف اخر اخبار نيكول سابا و السقا و تريكا و ينسى الناس اللى ليهم فعلا اهمية زى زويل ومجدى يعقوب اللى ماكانوا عمرهم ما حيكونوا للى هم عليه هنا فى مصر

لأننا شعب بيحب الرقص و التمثيل و الكورة من اكبر واحد فى البلد لأصغرهم و مستعد يسيب شغله و مصالحه الشخصية علشان

يقعد يتفرج على ابو تريكا و نسى الهدف من ابوتريكا و السقا انهم وسيلة ترفيهية زى الجوكر اللى بيقعد يتريأ على الناس فى ساحة الملك

فأصبح الملك( احنا كشعب) يترك كل مصالحه و مصالح رعاياه من اجل ان يتفرج و ينشغل بالجوكر( الممثلين و المغنيين و لاعبى الكرة) بل و يعطيه امواله و كل ما يملك من اجل ان يراه و هو بيتريأ على حد

وتلاقى فعلا انك علشان تعيش فى مصر مستريح يأما تكون مغنى يا لاعب كرة يا ممثل يا سياسى و تقريبا ولا واحد من دول لوشيلته من معادلة الحياة حايفرق فيها و لو بمليم و لكن احنا بنموت فى السفاهة و التفاهة

رأى فعلا ان المصريين سبب رئيسى للى هم فيه هو انهم اخدوا فترة كبيرة من غير رقابة على افعالهم و ان الحل الوحيد ليهم دلوقتى هو مش الديمقراطية و لكن الديكتاتورية و الرقابة الحازمة و العقوبات الصارمة الموجعة

طبعا حاتقول ان الديكتاتورية مش حلوة و ....... بس فعلا لو فى حد بيحب البلد دى اكتر ما بيحب نفسه ونفذ الكلام ده اكيد البلد حالها حايتصلح بدل ما كل واحد بيدور على ثغرة فى شغله و انعدام الرقابة علشان يسرق و ينهب

ده لو احنا بس طبقنا حد السرقة انا متأكد ان 95% من اللى انت بتشوفهم ماشيين فى الشارع حتلاقى ايدهم مقطوعة فما بالك بالزنا و القذف و ..... الخ

ملخص الكلام المصريين دلوقتى محتاجين للكرباج اكتر من اى وقت مضى. ناس ممكن تقول ان ده مش الحل بس انا حاضرب مثال بسيط الدواء اللى بتاخده ممكن يكون طعمه مر و له اثار جانبية و لكن كله يتستحق التضحية من اجل الجسم ككل

ياريت الناس تحاول تتعلم و تقرأ صح و ما تتهاونش فى اى حاجة بيعملوها سواء فى الشارع او فى الشغل او البيت

و تعرف ان اى اهمال بسيط او لامبالاة او عدم مراعاة لشعور الاخرين او انتهاك بسيط للقوانين لتغليب المصلحة على الغير فى هذه المرحلة الخطرة للشعب هو نتاج الفساد المستفحل و اللى بيزيد زى الوباء..... كفاية بقى نوم فى العسل !!!!